باي باي الفقر. بقلم المبدع // ادريس جبيلو

باي باي الفقر

جرب وعيش
بعشرين درهم
غ نهار ماتگديش
ولاتزيدينا هم

المدرسة ف باب الدار
وفوق منها اسبيطار
الفرماسيان ليهم جار
والسوق مايحتاج صيار

عيش النخوة
ومن الفقر طرب
هي تگد الحلوة
للتلميذ وباش يركب

افتح الباب وماعليك
غير گول شبيك لبيك
وكلشي يكون بين يديك
عشرين درهم تهنيك

كيف اللي مااتكوى
للدرويش يتقرب
وكيف مايگول اللقوى
تعوج الفم وتعطب

عيشتك ف الامان
كسبت خاتم سليمان
وباي باي الفقر ياانسان
حالك اصبح مزيان

اللي دوى
بلا مايجرب
كلامه ف الخوا(ء)
وعلى الحال مغرب

الدنيا مشرارة
الناس فيها حگارة
مدوقين لبعضهم المرارة
والايام عليهم دوارة

الحق الحق
حنا وصلناك
ل عريش الحبق
وهزيتينا ف قفاك

شميتي وعجباتك الشمة
رقتي وعقدتي الهمة
ونطقتي بهاد الكلمة
ماحشمتي مااعتذرتي نادمة

بقلم ادريس جبيلو