يلا معايا يا شطار نشوف دنيا من الاسرار .... و رحلة جميله فى عربة قطار حكايات يوميه عدت عليكم و كمان عليه و هى عباره عن حفلة زار فى عربة قطار مليانه اسرار .... هواها جنه وبردوا نار مسافر بلاد عشان الزاد و فوق كتافه كومة ولاد و صوت بياع معايا نعناع ..... فوق روحك بنص بتاع و شلة كراريس فى الهيصه بتهيص و عروسه وعريس .... دا اكتر احلامنا بقت تهييس و شاب سارح فى زرع امبارح و الارض بور و الحلق مالح و راجل عجوز ميت يجوز .... بيمد ايده لكل بوز و موظفين متجبسين و الجبس روتين و الحاله طين و فتحة قرآن على الرحمن تذكره تانيه ليوم الدين .... و عيون محرومه و حاجات مكتومه و ناس بتزيط دا فى الزحمه كله عبيط و حرامى واقف بخبث .... شايف جيب قفطان واقف سرحان فى الست مراته و كتيره التزاماته تسكت عيالها و تسمع سكاته و بصة شباك على حلم هناك ياريت الحق يرجع لصحابه .... و واقف ع الباب بيكح هباب ساب الزمن فالزمن سابه و الرحله محطات حياه و سكات .... و كرسى واحد بيشيل الوفات دى عربة قطار مليانه اسرار .... هى دى دنيتنا أشبه بحفلة زار . بقلمى / محسن العربى شاعر الإبداع
ليست هناك تعليقات:
إرسال تعليق