حبي
أنا حبي
مالوش تصنيف
مالوش توصيف
مابيعديش سحابة صيف
مالهش زمان
مالهش مكان
مهّواش بيت
ومتحدد وله أركان
مالوش عنوان
بخط عريض
أنا حبي
بمية عنوان
أنا قلبي
يساع ف الحب
مليون قلب وزياده
ومش مغصوب
على عشقي
أنا معشقش بالعادة
فمثلا لو هاقول صاحبي
داعشق كبير
حكاياتنا اللي عشناها
واسرارنا اللي قولناها
دفنّاها ف سابع بير
فاهمني بلمحه من عيني
ولو زعلان بيرضيني
أنا ماقدرش على زعله
باصالحه بنظره من عيني
وده مش حب
نوّر قلبي وسنيني؟
ودي أختي اللي شايله
من زمان همّي
أنا الأب اللي بيربي
وهي اللي بقت أمي
ولو مش حب داسمه ايه؟
و فيه شاعر أكيد موهوب
ولو ناشر ف ألف جروب
باروح ادخله واعلق
ولا باهرب ولا بازهق
كأني في هواه مجذوب
وناس تانيه بتكتبلي
قصايد حب في كلامي
أكيد بابعتلهم حبي
ف احلى سلام
واستاذي اللي علّمني
وتلميذي اللي بيوطي
خجل منّي
وده شال شغلي
وأنا غايب
وده جاب سيرتي
وانا غايب
بكل الخير
وناس ماشفتهاش لكن
تحس بحبهم ساكن
صميم القلب
صداقتهم بطعم الحب
مستر عادل
ليست هناك تعليقات:
إرسال تعليق