آهات الأولة. آه . بقلم المبدع // صبري عطوه خليل‏

آهات
الأولة. آه
من بعد بسم اللاه
والتانية صلاه
على محمد بن عبد اللاه
والتالتة يمين بالله
نصيحة ويابخت عامللها
أوصيك ياخللي إنتباه
للكلمة قبل ترتيللها
إن طلعت مالها نقاه
ولا تقدر تاني تغربللها
سهم مايلتفت وراه
ولاله جذور يحنللها
مايطاوع إللي رماه
سكته مجبور يكمللها
يصيب بآخر مداه
وغرامته عليك تحصيللها
بلسانك طوق النجاه
نصيحة مني وإعقللها
الأولة والتانية آه
يارب بالستر جمللها
والتالتة تابتة بالآه
أعاتب الأيام وفعايللها
حمولي بظهري تقيلة
مافي جمال يجمللها
كتيرة ماهي بقليلة
غصبني القدر وحمللها
مايلة ومالي حيلة
ولا مالك أعدللها
جربت الصبر وسيلة
مل الصبر بشايللها
حلف مايبات ليلة
ولا يعاود منازللها
عقد لي الهموم شيلة
وجوة قلبي تلتللها
تزاحم أحاسيسي الجميلة
ولنبضاتي باتت تبرجللها
قصرت أنفاسي الطويلة
ضاق صدري بتهاويللها
كسرت ضلوعي النحيلة
وبان بجلدي تراهيللها
طبعت بوجهي مقيلة
حروفها تجاعيد تأوللها
قتلت أحلامي غيلة
واليأس تمتم وسرفللها
صبحت آمالي ضئيلة
ترجع السيرة لأوللها
باتت النفس عليلة
مالها طبيب يعللها
الشكوى بحلقي ذليلة
عجز اللسان يرسللها
كلماتي حايرة هزيلة
وحروفي ماآدر أشكللها
أبياتي أحزان بتفعيلة
والقافية هموم بأرحللها
آهاتي بتخرج صهيلة
معاني كيف أوصللها؟
ماآدر أتم الجميلة
ولا أضحي بمبادئي وأعطللها
ما يهز الشجرة الأصيلة
غير فرع منها يزلزللها
دللوني ياأهل الفضيلة
أصولي ياناس ما أبدللها
دمائي نفس الفصيلة
والعرق دساس محللها
دي عين وصابت العيلة
وصدق إللي قايللها
أدعوك بصفاتك الجليلة
يارب حمولي تنزللها