ابحال البارح ابحال اليوم . بقلم المبدع // محمد لمراحلي

ابحال البارح ابحال اليوم
.
اطفات الشمعة
والليل زال
وامشات امعاه الگمرة
نشفات الدمعة
مات الحلم
دفنوه فالقلعة
دارو اگنازتو فالقاعة
قالوا
مات شهيد
ؤ مزال غادي يحيى
والشمس
اتبان ليها الطلعة
اسنين وأعوام
ذاب لقبر
رجعات ذكرى الشهيد
سلعة
من سوق ل سوق
فوسط الزحام
هايمة
شداها الخلعة
لا شمس طلعات
ولا شهيد احيى
غير اخرايف
ب نفس الطبعة
امشى قوم
ؤ جا قوم
سبحان الله
نفس البسمة نفس الدمعة
نفس الصوت
امكرر
ف نفس الصمعة
محمد لمراحلي
 فاس