ولا بسمع . بقلم المبدع // محمد الشرقاوي

ولا بسمع
___________________
ولا بسمع كلام عاجز
ولا بسمع كلام كداب
أنا الشاعر أنا الفايز
أنا وحلمي سوا أحباب
وصوت الفجر ف وداني
وضي الشمس ناداني
تكون القمة عنواني
بإذن مسبب الأسباب
ولا بسمع كلام عاجز
ولا بسمع كلام كداب
____________________
ولا بسمع لصوت خايف
بيرسم دنيته أحزان
وماشي ف سكتي شايف
طيور تبني على الأغصان
رسالتي مصر احميها
بروحي وعمري أفديها
وأزرع في أراضيها
أمل يحضن كبار وشباب
ولا بسمع كلام عاجز
ولا بسمع كلام كداب
_____________________
وعمر اليأس ما عرفني
ولا عرفته ولا شفته
ورب الكون بينصفني
عدد أنفاسي انا خفته
بحن لطفل بيشاور
بنظرة عينه بيحاور
وناس صافية بتتزاور
وقصة قابلتها ف كتاب
ولا بسمع كلام عاجز
ولا بسمع كلام كداب
______________________
تعالوا نرسم الفرحة
لشعب النيل ونحميها
ولا نعرف قلوب جارحة
سهام الغدر ف عنيها
كتبنا بعزمنا فكرة
حلمنا بفرحنا بكرة
قلوبنا لربنا شاكرة
ومش خايفة سحب وضباب
ولا بنسمع كلام عاجز
ولا بنسمع كلام كداب
______________________
شعر / محمد الشرقاوي