. حكاية أيامنا..بقلم المبدع // أيمن بلال

..... حكاية أيامنا....

تدور الحياه بينا وتلف
وتسرق مننا أحلي أيامنا

حاجات تتقل وحاجات تخف
وتتغير مع الأيام حمولنا

ونقرب وعن بعضنا نتغرب
ونهرب في البعد لأحلامنا

ومهما م اللي كان نهرب
ساكن خياله في همومنا

حكاية وكل يوم بنحكيها
نعيشها بس ف أوهامنا

وأيام من عمرنا تعدي
ولحظة نعيشها بخيالنا

ونبقي ف عمرنا ذكري
تعدي لمحة في ترحالنا

ياحب كان أيام زمان
عدي علينا وخد قلوبنا

إيه اللي كان وجري
وحكم علينا ببعادنا

وسابنا نقول آه ياتري
لو ف حكايتنا ما إتعاتبنا

كان زماننا عايشين زماننا
ولسة أحلامنا هنا بتلاعبنا

ولسة الكلام بيننا بعيوننا
ولا كنا توهنا وتاهت قلوبنا

ولو يوم غنوة لينا تلقانا
تصحي هوانا وتعيد وجودنا

من كل اللي فات عايشك
وحبك وقلبك عايش حياتنا

ياذكريات صعب يوم ننساها
أو نلقاها بعدت عن أوقاتنا

ياذكريات أبدا ما يوم مات
اللي عشناه ولا مرة فاتنا

لسة صورتك ساكنة الخيال
محال تتوه صورة ذكرياتنا

سلام من قلب لسه عاشقك
لسة ساكنة فيه كل أوقاتنا

سلام ياحلم ضيعته وودعته
ف عز ما كان الحب هو زادنا

سلام من قلبي وعمري
وليل مستني ترجع حياتنا

سلام ياحب كان وعشته زمان
كان وزي ما كان جوا أحلامنا

........ أيمن بلال