صعب تعرفني..بقلم المبدع // أيمن بلال

..... صعب تعرفني.....

لو قلبك كان ليل أنا سهره
أنا ونسه أنا همسه وقمره
أنا حروف شعرك أنا أملك
أنا ضحكتك لو فارق زمنك أمله
.......
لو يوم عشقت هتلقاني هواك
تلقاني أمل بيمشي ف خطاك
تلقاني بكرة بفرحته بيستناك
تلقاني شمس الهوي وضله
.......
لحظة نومك أنا حلمك الصافي
حضنك لما تحتاج حضن دافي
بسمة من غير ما تحس توافي
وتقولك صباحك ورد بيحضن فله
.......
أنا طريقك لما تعشق الترحال
موالك لما يحلالك غني الموال
عيونك لما تشوف بيها الجمال
صاحبك اللي ف صحبته بترتاحله
.......
أنا كلمتين كتبتهم ساعة صفاك
ف لحظة كل المعاني كانت معاك
وقبل الكلمة كنت كلمة بأستناك
وبين حروفي إلهامك لقي خله
.......
في عز طفولتك كنت أنا أم قلبك
في عز جنونك كنت بقلبي عقلك
ف عز غربتك وتوهتك كنت بلدك
ولما طال ليل ألمك جيتلك بفجره
........
بتسأل مين أنا؟ أنا حد زمان حبك
عشتك خيال وعشت بيه سنين جنبك
لقيتك بين القلوب رحال خفت منك
ورضيت بالقرب ف عز بعدك وغدره
.......
أنا إللي رسمتك صورة حلوة وعشتها
لا يوم هتعيشها ولا مع غيري شفتها
أنا حكاية حبك اللي صعب عليك توصلها
أنا زمانك البرئ لو يوم نداك وسمعته
.......
متابعة دي الكلمة اللي بتربطني بيك
متابعة بأرسم بيها ألف خيال ليا وليك
متابعة ترضيني تكفيني تطمني عليك
أنا حد في الخيال عاشك ولا شفته
.. أيمن بلال