ربيع الذكريات . بقلم المبدع //أيمن بلال

..... ربيع الذكريات......

لحظة سكات تاخد قلوبنا ف سفر
للصبا حر الصيف والشتا والمطر
لعبنا شقاوة ولاد ولمة الحارات
وحبيبتي جاية مع أهلها م السفر

........
لحظة حنين وعينيا تقول كنتي فين
وحشتيني واليوم في بعدك سنين
تضحكي بنظرة فيها شوق ويا حنين
وحشتك؟ وحشني ف عينيكي القمر

.......
تتحرك إيديكي بشوق وإشارة سلام
وألف كلمة حب تتقال من غير كلام
وألف نظرة تحلف ان عيوني ما بتنام
وإنتي بعيدة عنيدة معايا حبة المطر

........
هو الزمن كان حلو ولا احلو بيكي
حتي الحياه كانت حلاوتها ف عينيكي
كان شئ غريب لما تلمسني إيديكي
بأبقي طير تحت السما ف رحلة سفر

.......
ياسكتي لما سكك الحياه كلها بتتسد
ياضحكتي لما دموعي تشق نارها الخد
ياغنوتي لما يطول في عمري الصمت
ياعمر كان عزفة كمان بتحضن دقة وتر

.......
عارف حبيبتي إن اللقا صعب ومحال
عارف إنك بقيتي ف حال وأنا في حال
واللقا مش ف الحقيقة لكن في الخيال
والسكة بعيدة بعد الأرض عن القمر

......
ياتري بقي شكلك إيه وإزاي بقيتي؟
ياتري فاكراني وللا خلاص نسيتي؟
ياتري أنا لسة ذكري بتعدي عليكي
لما تسافري وترجعي تاني م السفر
.......
أيمن بلال