غلبان في الحب . بقلم المبدع // أيمن بلال

‘‘‘‘‘غلبان في الحب ‘‘‘‘‘‘ً

ياواخدة مني قلبي ومسافرة
وحياة أبوكي خليكي فاكرة
إنه خام مالوش في الكلام
وف الحب معندوش أي فكرة
‘‘‘‘‘‘
أصله عبيط وقطة مغمضة
عمره ماكان له ف الزروطة
بغنوة تبات عيونه معيطة
بكلمة يروح في ألف سكرة
‘‘‘‘‘‘‘
عمره ما يوم عرف ستات
ولا في صغره عرف بنات
ولا له ف الفيس ولا الشات
لا له ماضي ولا حلم لبكرة
‘‘‘‘‘‘
بكر ياعيني لسة ولد ولود
بينه وبين تاء التأنيث حدود
خام ولا عنده حتي للكلام ردود
لو حب خجله يخليه في ورطة
‘‘‘‘‘‘‘
آخر ما عنده كلمتين عالورق
بضحكة تلاقيه ف الحب غرق
بنظرة واحدة يتهته وهاتك ياعرق
برئ وف البراءة تلاقيه بشرطة
‘‘‘‘‘‘‘‘
أمانة عليكي تعلميه الحب والهوي
ولو يوم عشق قوليله فين الدوا
أحسن ده ف حبك طاب وإستوي
وحكاية إنه خام خليكي ليها فاكرة
‘‘‘‘‘‘‘‘
ده طيب وإبن ناس ورقة وحساس
إسألي عليه نجوم السما والناس
ده يوم ما فكر يحب والله إحتاس
وسابلك قلبه تخديه وإنتي مسافرة
‘‘‘‘‘‘‘‘
أيمن بلال