@سيدي الرئيس عشان بحبك لازم اقولك احساسي@
انا مواطن عادي بسيط
ماشي بتداري جوة الحيط
دي رساله باعتها لمعاليك
من كتر حبي وعشمي فيك
انا عارف وطنيتك واخلاصك كويس
ونفسي ابقي طلعت في طباخ الريس
طبق الكشري مش بنص جنيه
ولا حتي الفول بقي فيه بجنيه
بلسان محدودي الدخل هعبر
مش هتكلم عن رز وسكر
ولا. عن طفل جعان متصبر
هتكلم عن فجوة بتكبر
انا مش بقلل من انجازاتك
وواثق عن نفسي في قدراتك
بس انا فيه ناس غيري كتير
مش قادرة تستوعب ياكبير
ودة سؤالهم محتاج تنوير
الحقيقة فينها هي
لية ياواضحة مداريه
شعب بيقاسي المرار
والسلع اسعارها نار
والرئيس بوعود كتير
انه راح يرضي الفقير
والحكومه بتصريحات
والامل جوانا مات
قولولي اصدق مين في دول
المواطن ولا المسؤل
تحيا مصر معاك ياسيسي
بس انا اتهلهل قميصي
تحيا مصر بعلو الصوت
بس الاقي لعيالي قوت
احنا اتفقنا نبني مصر
مش عشة ليا وغيري قصر
والدنيا تنزل فيا عصر
ولا اكون عصفور ياكلني صقر
الحقيقه فينها هي
لية يا واضحة مداريه
ماتسيبنيش ياسيسي اصدق
ان مصر خلاص بتغرق
حس بينا وخد قرار
احمينا من الانكسار
العقول من الجوع بتغيب
مش هتميز بين عدو وحبيب
وسهل يخدعها الغريب
احنا معاك بقلوبنا ياريس
بس ادرس احوالنا كويس
حب الناس كان ليك جبار
حلفوا ليمشوا معاك المشوار
لكن اطحنوا وداقوا مرار
واعداءك شتتوا فينا الافكار
استغلوا الازمات باستمرار
سواق توتوك عالشاشة يبان
اتكلم بحماسة وبيان
قولنا مواطن زيينا غلبان
طلعوا وقالوا انه اخوان
توهنا تعبنا من التفكير
من طيب ومين الشرير
شايلين جميلك فوق كتافنا
ومعاك لقينا امان لخوفنا
بس اتحبسنا في ضيق ظروفنا
قوم يا رئيسنا واعمل حاجة
الناس لوجودك محتاجة
دوس علي مارد الاستغلال
شيل من علي اكتافنا الاحمال
انا اسف ماقدرتش اخبي
احساسي وكلامي من قلبي
يازعيمنا احنا لسه بنحبك
وخايف جهلنا يصبح ذنبك
الحقنا قبل نتوه يا رئيسنا
والمولي هو اللي حارسنا
الحقيقه مالها فين هي
مالك كده ياواضحه مداريه
وختاما رجاء من السادة القراء
الوقوف دقيقة حداد علي ارواح
شهداءنا الابرار ابناء مصر
مصر مجروحة
تحياتي
وليد النميري
ليست هناك تعليقات:
إرسال تعليق