ياموج البحر . بقلم المبدع // معوض حلمي

 ياموج البحر )
ياموج البحر ياصابر 
أنا زيك وكلي هموم 
ف وسط النوا بتعافر 
وانا صابر على المقسوم
ياموج البحر يا هايم
غريق ف العشق رسيني
لا صاحي .. ولا نايم
مجروح وجرحي كاويني
ياموج البحر انا مليت
تعبت وتوهت ف الزحمة
عشت كتير وما تهنيت
وجايلك طالب الرحمة
ياموج البحر ياعايم
أنا التايه ف تأويلي
كفاية عليا تتعازم
يا تهدي .. ياترميني
ياموج البحر انا زيك
شكلك ف شكلي يبان
لا تلومني ولا اعاتبك
دوبنا من الأحزان
ياموج البحر ماتحاسب
بتتعاجب بحبة ريح
نفسي شوية نتعاتب
مانتغالب نكون مجاريح
ياموج البحر وديني
لمحبوبي وزاد الشوق 
وصلني إليه وعديني
يهنيني وبالي يروق
ياموج البحر يارايق 
تحلالي ويحلى العوم
أنا زيك كمان عاشق
ومفارق جفاني النوم
~~~~~~~~~~~~~
بقلمي .. 
معوض حلمي 
منشأة بطاش 
تمي الأمديد 
دقهلية