( خمسة فرفشة ) بقلم المبدع // محفوظ البراموني

( خمسة فرفشة )

هو ..
و
هي ..

هما المساكين ..
دارت عليهم السنين ..

عارفين ..
و مش عارفين ..

الدنيا ..
رايحة بيهم فين ..

عيشتهم كلها شقى و طين ..
و أخرها بقت عجين .. 

عيال و مسؤلية عايشين ..
ع أد الإيد و مش عاجبين ..

كل يوم هم و غم متحدين ..
العيشة صعبة و هما متخدرين ..

هيعاكس يا ستي مين و للا مين ..
فاكرين نفسكم معسلين ..

إنتوا الإتنين منيلين ..
ف الحب مساكين ..

ف الهم معجونين ..
ف الغم مسلوقين ..

ف النكد متحمرين ..
ف الغلاسة مغليين ..

هو ..
حاطط إيده ع راسه ..
شايل الهم و الغم أساسه ..

هي ..
ماسكة المقشة ب تبص البصة ..
تحرقك بيها و تعض العضة ..

هو و هي ..

و النكد تالتهم ..
جتكوا نيلة ع خبيتكم ..

إفرجوها الله يعمر بيتكم ..
ل حسن يولع من شياطنكم ..

وتبقوا عايشين ف سوادكم ..
هتنكدوا عليكم و ع ولادكم ..

الدنيا مش نقصاكم ..
الظاهر دي حياتكم ..
مقفولة زي وشوشكم ..
وشوش خشب الله يقرفكم ..

إهدوا شوية يا عنية ..
ده النهاردة الجمعة ..
سيبها و روح صلى يا سمعة ..

هذيان قلم : 
: محفوظ البراموني :