زى ما هيه . بقلم المبدع // محمد الشرقاوي

زى ما هيه 
___________________________

ونتحايل
مع الدنيا 
نعيش فيها وتقبلنا
فتتعامل 
بذوق ثانية 
وهيه بجد ناوية لنا 
تزيد الجرح جوانا 
تقول للفرح ينسانا 
عشان احنا اللى عاشقينها
وهيه الخاينة
بايعانا
رموشها
تشهد الساحة
سنان منشار
خدودها
شكل تفاحة 
وطعم مرار 
وتحلف قد ما تحلف 
تصون العهد ما تخلف 
وزى الموجة ما بتجرف
غصون أزهار 
وشايفينها
وعارفينها
سطور الغدر مكتوبة
على جبينها
ومن تانى تنادينا
بنظرة عين 
ومن تانى تلاقينا 
نقول عايزين 
نلاقيكى
ندوب فيكى
نعيش فرحة 
لياليكى
فتتمايل
وتتخايل
ونرجع تانى نتحايل
وهيه زى ما هيه 
بتتعامل
___________________________

ونتحايل 
على همومنا
نفارقها
وبتغافل
ساعات يومنا 
وتسرقها
ونصبح كلنا تايهين
على موت الأمل 
خايفين 
نقاسى قد ما نقاسى 
لكن نفس الطريق 
ماشيين 
خدتنا الدنيا فى دروبها
رضينا نعيشها بحروبها
ولما اتمكنت فينا 
بقت دايسانا بكعوبها
شبعنا هوان
وقلنا كمان 
تعالى وارسمى بلونك
جبال أحزان 
ما هو انتى البحر والمينا
ومالكة كل ما لينا
ولا نعرف حبيب دونك 
ولا عنوان 
وإمتى وفين 
هتبتسمى
بدون أوجاع 
واشوف مع مين 
حروف إسمى
بدون أطماع
أنا عاشق 
لأحلامى
ولو بحلم
بأوهامى
واعيش جاهل 
ولسه الحلم مش طايل 
وهيه زى ما هيه 
بتتعامل
___________________________
شعر / محمد الشرقاوي