هي قالت . بقلم المبدع // سامح نصر

هي قالت
مش ح اسيبك مهما يحصل...
هو قال
صعب يوم ب غيرك أقبل...
هي مره في مره تبعد... 
هو يسأل
هي تعند...
هي شافت حد غيره...
هي حبت حد تاني وحبها...
هو مش عارف مصيره
وضعه ايه ف قلبها...
هي عايشه حياتها بَعده...
هو متعذب في بُعده...
هي مش فاكراه وناسيه
هو قلبه عندها...
هي بتجهز لفرحه...
توب جميل أبيض وطرحه...
هو راح عليها يسأل
شاف حبيبته جنب غيره
أبتسم... وباركلها...
دمعه نزلت غصب عنه
والدموع مش وقتها...
مد ايده وقام ماسحها
وقال خلاص..كان وانتهى...
ماشي بيكلم في نفسه
هي مش قالت ف يوم هتموت عشاني ؟...
هي مش قالت إنها دايبه ف حناني؟...
مش هي هي..
ولا يمكن حد تاني؟...
أسئله ورا اسئله
والجواب بقه مشكلة
طب الصور والذكريات
كانت سراب؟....
والسهر للصبح دايماً
وعاوز تقفل.. اقفل انت
اصلي عاشقه.. وقلبي داب...
طب كلامها وضحكها
دا لسه بيرن ف وداني...
لسه سامع منها كلمه (بحبك) من ثواني...
كنت لما بقول (حبيبتي)
تقولي مسمعتش كويس.. عيدها تاني...
مش حبيبتي.. مستحيل
حبيبتي ماتت...
واللي عيشته زمان معاها
ايام وفاتت...
وأن حد يوم عنها سألني
هرد اقول..
خلوني ساكت....
بقلمي 

سامح نصر