كان يا ما كان . بقلم المبدع // احمد لمراحلي

كان يا ما كان
الگلسة ب جنب الواد
وقاية
والنزاهة غاية
تبعنا النزاهة
بين الورد والشوك والظل
ؤ خللينا لقراية
اخرجنا لا صحة لا عناية
واجرى الواد واحمل
واتعدى لحدود
اصبحنا حداه اشفاية
آش المعمول
والحال زاد غيم
والمركب اللي امعولين عليه
مزال جديد
ؤ مزال في البداية
اصعيب الثقة فيه
وصعيب ف حضنو
تلقى الحماية
شط الامان بعيد
والما. هايج امخروض
اجرف معاه اليابس ؤ لخضر
والوقت ضيق
ماشي انتاع الشكاية
الحال زاد اصعاب
والحملة واخا امجهدة
غلفوها بالوشاية
زينوا المنظر فالشاشة
ؤ صبحات الضحكة الصفرة
ظاهرة بالبشاشة
ؤ في الكواليس
اعمال يبليس
مدعومة بالدعاية
المركب اغراق
ؤ لغريق امشبط 
ف جدور الخيانة
فشلات الغاية
ؤ يا حسرة
الغشاش اول العزاية
اشكون ايشد اللجام
في وسط هاد الظلام
ؤ يرفع الراية
ترجع الگلسة من اجديد
ب جنب الواد
بلا خوف بلا اغدر
وانفرحو براسنا 
قدام لمرايا
ؤ ما ايهمنا
واخا انكونو تحت الوصاية
راحة البال
هي المطلوبة
ابغينا
انشربو ما الواد
انقي من السقاية
انرجعو لقلم والدواية
ونجعلو من ماضينا حكاية
اتكون ل احفادنا
عبرة وآية
راه الاهمال
اشبعناه كفاية
محمد لمراحلي
فاس