ضربنا الف حساب . بقلم المبدع // محمد لمراحلي

ضربنا الف حساب
وحساب
قلنا خلق الله
ما فيه ما يتعاب
واخا الوقت اصعاب
الدنيا احلوة مع لصحاب
دخلنا واد صعيب
وسط الغاب
دارت الايام 
اكتار لغيام ونزل الضباب
حتى لصحاب لقراب ؤ لحباب
داروا علينا انقاب
صبرنا وارضينا ب المكتاب
اجميع الاحلام 
تبخرات مع السحاب
وارجعنا نسمعو
غير فين امشى اشنو جاب
هادا حال الحمال الحطاب
خروف درويش وسط الدياب
المطمورة كبيرة
ولما احتاجينا 
ما القينا ما نديرو ف قراب
ؤ كولشي امقابل غير الصريط 
والنعاس والشراب
الصحة كتدوب 
ؤ لعمر غادي والوقت غلاب
والجردة اصفارت
ما بقاتش رحاب
النقلة اللي ترجيناها
طلعات فوق الشجرة غراب
لا بسمة لا لسان حلو 
كولشي غاب
العش وللى فيه شللى احزاب
كلها وصوتو 
والريش طار ؤ شاب
القلب اتحمل وعيى ؤ طاب
وراحة البال فين تتصاب
الشوق ارمانا لمرحلة الشباب
ايام كنا من صنف العزاب
كنا محبوبين
معروفين ماشي اغراب
كنا صعيب نتصرطو 
بحال اللعاب
حتى صرنا لعبة من الالعاب
كبرنا ؤ ما ابقى ينفع معانا 
لا دوا لا اعشاب
ردينا امرنا للواحد الوهاب
يجعل لينا حيلة وسباب
باش انخرجو من هاد الصراب
اقبل ما ندخلو 
من تحت التراب
هادي في خاطر
كل واحد 
ابقى فيه غير هريد الناب
ؤ ربي يغفر ليه الى تاب
محمد لمراحلي
فاس