الحــــب وزهــــــور الطـــــــريــق
,,,,,,,,,,,,,,,,,,,,,,,
ورجعنا تانى ..
نواجه الدنيا الحزينه بالقلق
سبحان هو اللى خلق
لينا العواطف والشعور
إيه اللى خلى النور بيبعد عننا
إيه اللى خلى الدنيا تهرب مننا
لازم تعود من تانى ..
للبيت اللى شافنا .. واحنا ويا بعضنا
ازاى هانهجر أرضنا
واحنا اللى كنا زرعنا فيها كل شئ
الحب وزهور الطريق
وماكانشى لىّ رفيق سواك
ونسيم على الشباك ..
بيرعش لينا فى طرف الهدوم
إرجع عشان كل الهموم تهرب ..ونوصل للضيا
الحب سكه شريفه ماشى عليها كل الأوليا
وانت يا أجمل أغنيه
فى حياتى .. عايز ليه تغيب
لو سيبنا بعض .. ضرورى نوصل للمغيب
أصبح غريبه فى الوجود ويا الغريب
خلى بقى الليل والضلام
يصبح حنين
علشان نفوق
عشان ما نطلع تانى فوق
نوصل بفرحة عمر لجبال الشروق
ونعود لبيتنا الدافى ..بيتنا فى انتظار
نرجع وويانا النهار
نطفى المرار من روحنا ..واتهنى معاك
تدبل بقى الأشواك ..
وتطلع لينا زهره منوره
أنا فى انتظارك ليل نهار ع القنطره
تيجى عشان .. تخطفنى بحصان الأمل
يا حبيبى خلى جراح حياتى تندمل
إيه العمل وانت بعيد ؟
ما بقاش فى روحى شئ جديد
ولا عاد خلاص مواعيد تاخدنى للحياه
يا أحلى أحلى هديه من عند الإله
....................
✍...عبيـــــــــــــــرالجنـــــــدي ...
من ديوان / المصراويه
ليست هناك تعليقات:
إرسال تعليق