لكل ديك أذانه
كل وقت وله أذان
ولكل ديك أذانه
الفرخ الفصيح يبان
بيصيح قبل أوانه
تصبغه الطبيعة بألوان
ويفضل معروف بألحانه
مايهمه قيد سجان
ولو الخسيس سجانه
مادام بيصيح بإيمان
وبقدر الله إيمانه
إللي بيحب إنسان
تمللي سيرته على لسانه
مال العزول زعلان
وبياكل في خلقانه
النصيحة ع الملأ بهتان
ولو صح القول وبيانه
فارغ الأواني رنان
وصوت المليان نكرانه
ناقص العلام ببغان
وصاحب العلم صانه
تاجر الكلام خسران
مهما تعب بميزانه
يعيش العمر ندمان
وما يفيد الندم ندمانه
مفلوت اللسان منهان
ولو السامعين خللانه
السكوت هيبة ياغلبان
وملافظ الرجل عنوانه
إفشي السلام باللسان
وخللي الحقد بمكانه
إن جيت تدخل مكان
إطرق أول بيبانه
البيت مدخله م البيبان
والبيت ينده بسكانه
لاتفوت إلا بإستئذان
وأقف إنتظر إيذانه
غض البصر ياجبان
حتى تستتر نسوانه
كما تدين تدان
بعقر البيت،يا جدرانه
الجود بالموجود ولو هان
دا الكرم محمود بإمكانه
ومادومت خرجت شبعان
إحفظ السر بكتمانه
العايد بالفايت نقصان
بالعقل حتى فقدانه
الله يعافيك ياعيان
ويرحم الأدب وزمانه
بقلم
صبري عطوه خليل
ليست هناك تعليقات:
إرسال تعليق